کمیبرج اے لیول کے طلبا کی کوششیں بالآخر رنگ لے آئیں، کیمبرج بورڈ نے 10، 11 اور 12 مئی کو منسوخ ہونے والے پرچے پر اوسط گریڈنگ کا فیصلہ واپس لے کر اکتوبر میں دوبارہ امتحانات لینے کا اعلان کردیا۔
کیمبرج ایجوکیشن کے کنٹری ڈائریکٹر، برٹش کونسل کے ڈائریکٹر اور پرائیویٹ اسکولوں کے سربراہان سمیت دیگر اسٹیک ہولڈر کے اجلاس کے بعد منسوخ شدہ پرچوں پر اوسط مارکنگ کے بجائے تمام منسوخ شدہ پرچے دوبارہ لینے کا اعلان کیا گیا۔
وفاقی وزارت تعلیم کے مطابق دوبارہ لیے جانیوالے پرچوں کیلئے کوئی فیس نہیں لی جائے گی تاہم ایسے کیسز کی دوبارہ ری اسیسمنٹ اور ری ایولیوشن کی جائے گی جن میں اسکولوں اور کیمبرج کے درمیان گریڈز میں بہت زیادہ فرق موجود ہے۔
ایسے کیسز اسکولز کی جانب سے کیمبرج کو بھیجے جائیں گے، اسیسمنٹ اور ری ایولیوشن کے 80 فیصد اخراجات اسکول جبکہ 20 فیصد والدین کو برداشت کرنا ہوں گے تاہم اس کے نتیجے میں اگر گریڈز تبدیل ہوئے تو پوری فیس واپس کر دی جائے گی۔
وفاقی وزارت تعلیم صوبائی حکومتوں اور جامعات کے وائس چانسلرز سے رابطے کرے گی تا کہ اسکولوں کے بچوں کو داخلے میں آسانی کیلئے اقدامات تجویز کیئے جا سکیں, اس سلسلے میں شکایات کے فوری حل کیلئے ایک شکایتی سیل بھی بنایا جا رہا ہے۔
واضح رہے کہ اس سے قبل کیمبرج بورڈ کی جانب سے پاکستان میں 9 مئی واقعات کے بعد اے لیول کے منسوخ کیے گئے پرچوں پر اوسط مارکنگ کا فیصلہ کیا گیا تھا جسے مسترد کرتے ہوئے ملک کے مختلف شہروں میں طلبا نے احتجاجی مظاہرے کیے تھے۔
