انسٹاگرام نے اپنا نیا لوگو متعارف کروادیا

انسٹاگرام کا نیا لوگو

مقبول ترین فوٹو شیئرنگ ایپ انسٹاگرام نے اپنا ایک دہائی پرانا روایتی سکرپٹ (cursive) فونٹ تبدیل کرتے ہوئے ایک نیا ورڈمارک لوگو متعارف کرا دیا ہے۔ 

تاہم، یہ تبدیلی صارفین کی توجہ سمیٹنے کے ساتھ ساتھ سوشل میڈیا پر شدید تنقید کا مرکز بھی بن گئی ہے۔

نیا لوگو کیسا ہے؟

انسٹاگرام کا نیا ورڈمارک آدھا سکرپٹ اور آدھا پرنٹ  کا ایک عجیب و غریب امتزاج ہے۔ ناقدین کا کہنا ہے کہ یہ نیا فونٹ اپنے پیش رو کے مقابلے میں پڑھنے میں زیادہ مشکل اور غیر واضح ہو گیا ہے۔

 طنزیہ طور پر سوشل میڈیا پر صارفین یہ سوال بھی اٹھا رہے ہیں کہ کیا یہ نیا ڈیزائن واقعی "انسٹاگرام" لکھا ہوا ہے یا پھر "Instagzam"؟

پرانے اور نئے لوگو کا ایک تقابل

انسٹاگرام کے سربراہ ایڈم موسیری نے اپنے اکاؤنٹ پر لوگو کی اس تبدیلی کا اعلان کرتے ہوئے کہا: 

" ایپ کے اوپر موجود یہ ورڈمارک پچھلے 10 سالوں سے تبدیل نہیں ہوا تھا، اس لیے اب اس کی تازگی کا وقت آ گیا تھا۔ یہ نیا ڈیزائن زیادہ صاف اور جدید ہے، جو ہمارے اصل انداز کے ساتھ ساتھ اس سادگی اور کاریگری کی عکاسی کرتا ہے جو ہمیشہ سے انسٹاگرام کی پہچان رہی ہے"

اگرچہ کمپنی کا مقصد برانڈ کو جدید بنانا تھا، لیکن یہ دیکھنا باقی ہے کہ صارفین اس نئے اور غیر روایتی انداز کو کتنی جلدی قبول کرتے ہیں۔