پاکستان تحریک انصاف کے رکنِ قومی اسمبلی اور اینکر پرسن ڈاکٹر عامر لیاقت حسین نے اپنی تیسری شادی کی خبروں پر وضاحتی بیان جاری کردیا ہے۔
تفصیلات کے مطابق ان دنوں سوشل میڈیا پر عامر لیاقت کی تیسری شادی کی خبریں گردش کررہی ہیں جس پر انہوں نے ایک وضاحتی ویڈیو پیغام جاری کیا ہے۔
سوشل میڈیا پر ایک ہانیہ خان نامی خاتون (جو خود کو اداکارہ اور ماڈل بتاتی ہیں )نے دعویٰ کیا ہے کہ وہ عامر لیاقت کی تیسری بیوی ہیں۔
ہانیہ کی جانب سے عامر لیاقت کی دوسری اہلیہ طوبیٰ پر الزام لگایا گیا ہے کہ طوبیٰ نے ان پر کالا جادو کروایاہے۔
اس حوالے سے عامر لیاقت نے وضاحت کرتے ہوئے انسٹاگرام پر ایک ویڈیو پیغام جاری کیا ہے جس میں انہوں نے ہانیہ خان سے شادی کرنے کی تردید کرتے ہوئے لوگوں سے مخاطب ہو کر کہا ’’ویسے بھی آپ میری ماشااللہ تین، چار، پانچ شادیاں کراچکے ہیں ، لیکن میری ایک ہی شادی ہے جو سیدہ طوبیٰ سے ہے‘‘۔
واضح رہے کہ سیدہ طوبیٰ ، عامر لیاقت کی دوسری بیوی ہیں۔ان سے قبل عامر لیاقت نے بشریٰ سے شادی کی تھی جس سے ان کے دوبچے ہیں۔
