پاکستان قومی ٹیم کے کھلاڑی کل وزیر اعظم عمران خان سے ملاقات کریں گے ، ملاقات میں چیئرمین پی سی بی رمیز راجہ بھی شامل ہوں گے۔
ذرائع نے اس بات کی تصدیق کی ہے کہ وزیر اعظم عمران خان سے پاکستان ٹی ٹونٹی ورلڈ کپ اسکواڈ کے اراکین کی ملاقات کرانے کا اہتمام کیا جا رہا ہے۔
ملاقات کے دن اور وقت کا تعین وزیر اعظم عمران خان کی مصروفیات کو مد نظر رکھ کر کیا جائے گا لیکن اس بات کا قوی امکان ہے کہ یہ ملاقات کل ہو گی اور اس کا مقصد کھلاڑیوں کا ورلڈ کپ سے قبل حوصلہ بڑھانا ہے۔
اس ملاقات میں پاکستان کرکٹ بورڈ (پی سی بی) کے چیئرمین رمیز راجہ بھی موجود ہوں گے۔
نیشنل ٹی ٹونٹی کپ کے لیے پاکستان ٹی ٹوئنٹی اسکواڈ کے تمام کھلاڑی اسلام آباد میں موجود ہوں گے ، پی سی بی نے تمام کھلاڑیوں کو نیشنل ٹی ٹوئنٹی کپ کھیلنے کا پابند کیا ہوا ہے تاکہ میگا ایونٹ کے لیے بھرپور تیاری کی جا سکے۔
نیشنل ٹی ٹونٹی کپ کا پہلا مرحلہ 23 ستمبر سے پنڈی اسٹیڈیم میں شروع ہو رہا ہے۔
