کراچی کے اہم کاروباری علاقے صدر میں دھماکہ ہوا کے جس کے نتیجے میں کئی گاڑیاں تباہ ہوگئیں اور ایک شخص جاں بحق ہوا ہے اور 13 افراد زخمی ہوئے ہیں۔
ڈی آئی جی ساؤتھ کے مطابق دھماکےمیں ایک شخص جاں بحق ہوا ہے جبکہ 13 افراد کے زخمی ہونے کی اطلاعات ہیں۔ زخمیوں کو جناح اسپتال منتقل کیا گیا ہے۔
دھماکے کی سی سی ٹی وی ویڈیو:
اسپتال ذرائع کے مطابق جاں بحق شخص کے جسم پر بال بیئرنگ کے زخم ملے ہیں جس سے یہ بات ثابت ہوتی ہے کہ یہ بم دھماکا تھا جس میں بال بیئرنگز استعمال کیے گئے۔
قانون نافذ کرنے والے علاقے جائے وقوع پر پہنچ گئے ہیں دھماکے کی نوعیت جاننے کیلئے تحقیقات جاری ہیں۔
پولیس کے مطابق دھماکا مرشد بازار کے قریب ایک بیکری اور ہوٹل کے باہر ہوا جہاں رات کے اس پہر کافی چہل پہل ہوتی ہے۔
دھماکے سے قریبی ہوٹلز اور رہائشی عمارتوں کے شیشے ٹوٹ گئے۔ ایدھی فاؤنڈیشن کے ترجمان کے مطابق کئی زخمیوں کو جائے وقوع سے ان کی گاڑیوں اور عملے نے اٹھایا ہے اور جناح اسپتال منتقل کیا ہے۔
دھماکے کی اطلاع ملتے ہی پولیس اور رینجرز کی بھاری نفری موقع پر پہنچ گئی اور علاقے کا گھیراؤ کر لیا گیا ہے۔ پولیس کے مطابق بم ڈسپوزل اسکواڈ کو بھی موقع پر طلب کرلیا گیا ہے۔
وزیراعظم شہباز شریف نے کراچی میں دھماکے پر افسوس کا اظہار کیا ہے۔
شہباز شریف نے اپنے بیان میں کہا کہ جاں بحق شخص کےاہل خانہ سےدلی تعزیت اور ہمدردی کرتےہیں، زخمیوں کی جلد صحت یابی کیلئے دعا گو ہیں، صوبائی حکومتوں کے ساتھ مل کر عوام، امن دشمن عناصر کا قلع قمع کریں گے۔
وزیراعظم نے وزیراعلیٰ سندھ کو زخمیوں کو بہترین طبی سہولیات کی فراہمی کی ہدایت کی۔
