الیکشن کمیشن نے اراکین پارلیمنٹ کے سال 2021 کے اثاثوں کی تفصیلات جاری کردیں۔
الیکشن کمیشن کی دستاویز کے مطابق وزیراعظم شہباز شریف کے اثاثوں کی کل مالیت 10 کروڑ روپے ہے، ان کی لندن میں ایک کروڑ 37 لاکھ روپے مالیت کی پراپرٹی ہے۔
دستاویز میں بتایا گیا ہے کہ وزیراعظم کے بینک اکاؤنٹ میں 20 لاکھ روپے ہیں، انہوں نے سلیمان شہباز سے 6 کروڑ 39 لاکھ روپے قرض لے رکھا ہے جب کہ شہبازشریف کا لندن میں بینک اکاؤ نٹ خالی ہے۔
دستاویز کے مطابق آصف زرداری کےاثاثوں کی مالیت 71کروڑ 42 لاکھ روپے ہے اور ان کی پاکستان میں 20 پراپرٹیز ہیں جب کہ آصف زرداری کی 5 جائیدادیں وراثتی ہیں۔
الیکشن کمیشن کے مطابق آصف زرداری کے پاس ایک کروڑ 66 لاکھ روپے کا اسلحہ بھی موجود ہے جبکہ بیرون ملک ان کی کوئی جائیداد نہیں، وہ 6 گاڑیوں کے مالک ہیں۔
بلاول بھٹو زرداری کے اثاثوں کی مالیت ایک ارب 60 کروڑ روپے ہے، وہ پاکستان میں 19 جائیدادوں کے مالک ہیں اور ان کے 7 بینک اکاؤنٹس ہیں جب کہ ان کے پاس 6 کروڑ 68 لاکھ روپے کیش ہے۔
الیکشن کمیشن کےمطابق بلاول بھٹو زرداری کے پاس بیرون ملک 150 تولہ سونا اور 7 گھڑیاں ہیں، انہوں نے دبئی میں سرمایہ کاری بھی کررکھی ہے، وہ دبئی میں2 جائیدادوں کے مالک ہیں۔
الیکشن کمیشن کے مطابق دبئی میں بلاول بھٹو کو ایک بنگلہ تحفے میں ملا اور دوسرا وراثتی ہے۔
تفصیلات کے مطابق سابق وزیراعظم اور چیئرمین تحریک انصاف عمران خان کے اثاثوں کی مالیت 14 کروڑ 21 لاکھ روپے ہے، عمران خان کے پاس زمان پارک لاہور اور میانوالی میں وراثتی گھر ہیں، بنی گالہ میں ان کا تحفے میں ملا 300 کنال کا گھر ہے۔
الیکشن کمیشن کے مطابق عمران خان کے بنی گالہ گھرکی اضافی تعمیرپر 1کروڑ 14 لاکھ روپےاخراجات آئے، زمان پارک گھرکی تعمیر پر 4 کروڑ 86 لاکھ روپے اخراجات آئے، عمران خان کے پاس بھکر میں تین وراثتی جائیدادیں بھی ہیں۔
تفصیلات کے مطابق عمران خان نےگرینڈ حیات ٹاور میں 2 اپارٹمنٹس کے لیے 1 کروڑ 19 لاکھ روپے ایڈوانس دیا ہوا ہے، عمران خان کی اہلیہ بشریٰ بی بی پاک پتن موضع مانیکا میں 52 کنال زمین کی مالک ہیں، بشریٰ بی بی موضع پیر غنی پاک پتن میں 379 کنال اراضی کی بھی مالک ہیں۔
الیکشن کمیشن کے مطابق بشریٰ بی بی اوکاڑہ میں 267 کنال اراضی کی مالک ہیں،بشریٰ بی بی بنی گالہ میں 3 کنال پر مشتمل گھر کی بھی مالک ہیں۔
