اسلام آباد: وزارت توانائی نے دعویٰ کیا ہے کہ بجلی کی ترسیل کا نظام پورے ملک میں مکمل بحال کیا جاچکا ہے۔
وزارت توانائی کا ایک بیان میں کہنا تھا کہ آج صبح کراچی کے جنوب میں 005 کے-وی کی دو لائنوں میں آنے والےخلل کو دور کر دیا گیا ہے۔
وزارت توانائی کے مطابق بجلی کے متبادل کارخانوں سے بجلی کی رسد بڑھائی جا رہی ہے جوکہ جمعےکی صبح تک معمول پر آجائےگی۔
دوسری جانب کراچی کے کچھ علاقوں میں بجلی آنےکے بعد ایک بار پھر چلی گئی تھی جسے اب بحال کیا جاچکا ہے۔
واضح رہے کہ آج صبح نیشنل گرڈ میں خرابی سے کراچی سمیت ملک کے مختلف شہروں میں بجلی کا بڑا بریک ڈاؤن ہوا تھا، حکام نے دعویٰ کیا تھا کہ بجلی رات 9 بجے تک بحال ہوجائے گی۔
وفاقی وزير توانائی خرم دستگیر کا کہنا تھا کہ کراچی کے قریب دو ہائی وولٹیج لائنز بیک وقت گریں، جو حیران کن ہے، پانچ سو کے وی کی دو لائنز میں خرابی کے نتیجے میں 8 ہزار میگاواٹ بجلی سسٹم سے نکل گئی۔
انہوں نے مزید کہا کہ جی ایم ٹیکنیکل این ٹی ڈی سی کی سربراہی میں انکوائری کمیٹی بنائی ہے جو تحقیقات کرکے چار روز میں رپورٹ جمع کرائے گی، کمیٹی بلیک آؤٹ کی وجوہات کا جائزہ لےگی، کسی خرابی کےباعث ہوا یاکوئی غفلت تھی۔
