بھارتی کرکٹ بورڈ کے سیکرٹری اور ایشین کرکٹ کونسل کے صدر جے شاہ نے کہا ہے کہ 2023 میں پاکستان میں ہونے والے ایشیا کپ میں بھارتی ٹیم شرکت نہیں کرے گی۔
بھارتی میڈیا کے مطابق بھارتی کرکٹ بورڈ کی سالانہ جنرل میٹنگ آج ممبئ میں ہوئی جس میں جے شاہ نے بھارتی ٹیم کے پاکستان نہ جانے کا بیان دیا۔ جے شاہ کا کہنا ہے کہ اگلے برس ایشیا کپ نیوٹرل وینیو پر ہو گا۔
ذرائع کا کہنا ہے کہ بھارت نے ایشین کرکٹ کونسل کے فورم کو نظر انداز کر دیا ہے، بھارت سے تعلق رکھنے والے اے سی سی کے صدر نے خود فیصلے سنانے شروع کر دیے ہیں، انہوں نے ایشین کرکٹ کونسل کے اجلاس کے بغیر ہی فیصلہ سُنایا۔
بھارت کے پاکستان نہ آنےکے معاملے پر پاکستان کرکٹ بورڈ (پی سی بی) نے مختلف آپشنز پر غور شروع کردیا ہے اور بھارت کے نہ آنے کے فیصلے پر پی سی بی ورلڈ کپ 2023 بھی نہ کھیلنے پر غور کر رہا ہے۔
یاد رہے کہ پاکستان نے 50 اوورز کے ایشیا کپ کی میزبانی اگلے برس ستمبر میں کرنی ہے۔
