سندھ کے سینئر صوبائی وزیر شرجیل انعام میمن نے آزاد کشمیر کے حلقوں میں انتخابات سے ٹھیک پہلے بسیں روانہ کرنے پر شدید تنقید کرتے ہوئے اسے ووٹرز کو خریدنے اور اثر انداز ہونے کی کوشش قرار دیا ہے۔
میرپور میں میڈیا سے گفتگو کرتے ہوئے انہوں نے الزام عائد کیا کہ بیس کروڑ روپے مالیت کی بسیں اور ٹرک الیکشن سے ایک دن پہلے بھیج کر دھاندلی کی گئی ہے اور کشمیری عوام کو مالی ترغیب کے ذریعے بیوقوف بنانے کی ناکام کوشش کی جا رہی ہے۔ انہوں نے سوال اٹھایا کہ کیا اس ہتھکنڈے سے باضمیر کشمیری عوام کو خریدا جا سکتا ہے؟
شرجیل میمن نے مزید بتایا کہ پیپلز پارٹی کی قیادت مبینہ دھاندلی کے عمل کو روکنے کے لیے خصوصاً میرپور پہنچی ہے اور الیکشن کمیشن سے پرزور مطالبہ کیا ہے کہ وہ وفاقی وزراء کی جانب سے جاری انتخابی سرگرمیوں کا فوری نوٹس لے۔
انہوں نے پختہ یقین ظاہر کیا کہ عوام کسی بھی تانگہ پارٹی کو ووٹ دینے کے بجائے پیپلز پارٹی کی پالیسیوں پر ہی اعتماد کا اظہار کریں گے کیونکہ کشمیریوں کو مادی ترغیب سے خریدنا ممکن نہیں۔