سابق صدر آصف علی زرداری نے سابق وزیراعظم عمران خان کی جانب سے ملتان جلسے میں مریم نواز کے حوالے سے کی جانے والی گفتگو کی شدید مذمت کی ہے۔
آصف علی زرداری کی جانب سے جاری کردہ ایک بیان میں کہا گیا ہے کہ 'جن عزت داروں کے گھروں میں مائیں بہنیں ہوں وہ ایسی زبان استعمال نہیں کرتے'۔
انہوں نے عمران خان کو مخاطب کرتے ہوئے کہا کہ 'خدارا اس سیاست میں اتنے نیچے نہ گر جاؤ۔
آصف زرداری نے مزید کہا کہ مائیں، بہنیں بیٹیاں سب کی سانجی ہوتی ہیں، یہ ہی پیغام بی بی شہید چھوڑ کر گئی ہیں۔
واضح رہے کہ ملتان جلسے میں خطاب کے دوران عمران خان نے کہا کہ ’مجھے کسی نے سوشل میڈیا پر تقریر بھیجی، مریم تقریر کر رہی تھی کل، اس میں اتنی دفعہ اور اس جذبے سے اور اس جنون سے میرا نام لیا کہ میں اس کو کہنا چاہتا ہوں کہ مریم دیکھو تھوڑا دھیان کرو تمہارا خاوند ہی ناراض نہ ہوجائے جس طرح تم بار بار میرا نام لیتی ہو'۔
