 |
| ایکس/@PakPMO |
تہران: وزیراعظم شہباز شریف نے تہران میں ایران کے شہید سپریم لیڈر آیت اللہ خامنہ ای کی آخری رسومات میں شرکت کے لیے ایک اعلیٰ سطحی وفد کی قیادت کی۔
پاکستانی وفد میں نائب وزیراعظم و وزیر خارجہ سینیٹر محمد اسحاق ڈار، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، وزیر داخلہ سید محسن نقوی، وزیر اطلاعات عطا اللہ تارڑ، چیئرمین پاکستان پیپلز پارٹی بلاول بھٹو زرداری اور دیگر اعلیٰ سرکاری حکام شامل تھے۔
اس موقع پر وزیراعظم نے اسلام کے لیے آنجہانی سپریم لیڈر کی گراں قدر خدمات کو شاندار الفاظ میں خراجِ تحسین پیش کیا۔
انہوں نے کہا کہ آیت اللہ علی خامنہ ای نے کئی دہائیوں تک ایرانی قوم کی غیر معمولی بصیرت اور دانشمندی کے ساتھ رہنمائی کی، جو ہمیشہ یاد رکھی جائے گی۔
وزیراعظم نے اس قومی سوگ کی گھڑی میں سپریم لیڈر آیت اللہ سید مجتبیٰ حسینی خامنہ ای، صدر ڈاکٹر مسعود پزشکیان اور ایران کے برادر عوام کے ساتھ مکمل یکجہتی کا اظہار کیا اور اللہ تعالیٰ سے آنجہانی کی مغفرت کے لیے دعا کی۔
تقریب میں شرکت کے بعد، وزیراعظم جو آج صبح تہران پہنچے تھے، اپنے سرکاری دورے پر ترکیہ کے شہر استنبول کے لیے روانہ ہوگئے۔
یاد رہے کہ اس موقع پر وزیراعظم کے ہمراہ چیئرمین سینیٹ سید یوسف رضا گیلانی اور اسپیکر قومی اسمبلی سردار ایاز صادق کی قیادت میں ایک پارلیمانی وفد، اراکینِ پارلیمان اور وزیراعلیٰ سندھ سید مراد علی شاہ بھی جنازے اور تعزیتی تقریب میں شریک ہوئے۔