اسلام آباد: تحریکِ انصاف کے چئیرمین عمران خان کے چیف آف اسٹاف شہباز گل نے دوران تفتیش پولیس کے سامنے پاک فوج سے متعلق بیان دینے کا اعتراف کرلیا۔
جیو نیوز اردو کی خبر کے مطابق تفتیش کےدوران شہبازگل نےفوج مخالف بیان دینےکا اعتراف کرلیا ہے۔
پولیس کو دیےگئے بیان میں شہباز گل نے کہا کہ میرےخیال میں، میں نے پارٹی پالیسی سے ہٹ کر کچھ نہیں کہا، بیان سوچ سمجھ کر دیا ہے۔
واضح رہے کہ منگل کو اسلام آباد پولیس نے شہباز گل کو بغاوت کے مقدمے میں وفاقی دارالحکومت اسلام آباد سے گرفتار کیا تھا۔
یہ بھی پڑھیں: تحریک انصاف کے رہنما شہباز گل دو روزہ جسمانی ریمانڈ پر پولیس کے حوالے
اسلام آباد کے تھانہ کوہسار میں شہباز گل کے خلاف سٹی مجسٹریٹ کی مدعیت میں بغاوت کا مقدمہ درج ہے۔
ایف آئی آر کے متن کے مطابق شہبازگل نے ٹی وی چینل پر الفاظ ساتھیوں کے ساتھ مل کر ایک ایجنڈے کی تکمیل کیلئےکہے، شہباز گل کے بیان اور تقریر کا مقصد فوج میں بغاوت پھیلانا اور سازش کرنا تھا۔
ایف آئی آر میں کہا گیا ہے کہ بیان اور تقریر کا مقصد عوام میں فوج کےخلاف نفرت پھیلانا اورسازش کرنا تھا، شہباز گل نے کوشش کی فوج کے مختلف گروہ بن جائیں، ان کا مقصد فوجی جوانوں کو اپنے افسران کا حکم نہ ماننے کی ترغیب دینا تھا، شہباز گل نے ملک میں انتشار پھیلانے اور فوج کو کمزور اور تقسیم کرنے کیلئے بیان دیا۔
ایف آئی آر میں درج ہے کہ شہباز گل نے پاکستان کی سالمیت کو نقصان پہنچانے کیلئے فوج مخالف بیان دیا اور ملک دشمن ایجنڈے کی تکمیل کرتے ہوئے مجرمانہ سازش کا مرتکب ہوا۔
