کراچی میں تندور مالکان نے کمشنر کراچی کے احکامات ہوا میں اڑا کر روٹی سستی نہ کرنے کا اعلان کردیا۔
شہر میں کمشنر کے روٹی 12 روپے اور نان 17روپے کرنے کے نوٹیفکیشن پر عمل نہیں ہوسکا۔
تندور مالکان کا کہنا ہے کہ آٹا سستا ملے گا تب ہی روٹی بھی سستی ہوگی، کمشنر کراچی نے بغیر مشاورت فیصلہ صادر فرما دیا۔
ادھر کراچی گروسرز ایسوسی ایشن کا کہنا ہے کہ فلور ملز دکان پر آٹا 100 روپے کلو پہنچا رہے ہیں، جوڑیا بازار سے آٹے کی بوری طارق روڈ لانے کا کرایہ 100 روپے ہے، تھیلی اور دیگر اخراجات بھی ہیں جب کہ بازار میں ڈھائی نمبر آٹا 120 روپے کلو اور فائن آٹا 140 روپے کلو ہے۔
واضح رہے کہ کمشنر کراچی کی زیر صدارت آٹا ،چینی، نان اور روٹی کی قیمتوں کے جائزہ اجلاس ہوئے۔ اجلاس کے بعد قیمتوں سے متعلق نوٹیفکیشنز جاری کردیےگئے جن کے مطابق کراچی میں تندوری نان 17 جبکہ چپاتی کی قیمت بارہ روپے مقرر کی گئی ہے۔
