بھارت میں ایک بے اولاد عورت کو اولاد کا جھانسہ دیکر جنسی زیادتی کا نشانہ بنانے کے الزام میں ہندو سادھو کو گرفتار کرلیا گیا۔
بھارتی میڈیا کے مطابق خود ساختہ سادھو سوامی ویرا گیانند گری کو ریاست مدھیہ پردیش کے شہر بھوپال میں ایک خاتون یاتری کو جنسی زیادتی کا نشانہ بنانے کے الزام میں گرفتار کیا گیا۔
متاثرہ خاتون کی جانب سے الزام عائد کیا گیا تھا کہ سادھو نے اسے بھوپال میں 17 جولائی کو جنسی زیادتی کا نشانہ بنایا۔
پولیس کے مطابق خاتون نے بتایا کہ وہ شادی کے کئی سال بعد بھی بے اولاد ہے اور سادھو نے یقین دلایا تھا کہ وہ پوجا پاٹ کے ذریعے اسے اولاد کے قابل بنا دے گا۔
خاتون نے مزید بتایا کہ سادھو نے اسے کوئی چیز کھانے کو دی جسے کھانے کے بعد وہ مدہوش ہو گئی جس کے بعد سادھو نے اس کے ساتھ زیادتی کی۔
پولیس نے سادھو کو گرفتار کر کے واقعے کی تحقیقات شروع کر دی ہیں۔
